مولانا نو ر الحسن راشدکاندھلوی کا کتب خانہ

 کاندھلہ میں آپ کا کتب خانہ اہم علمی کتب پر مشتمل ہونے کے ساتھ  نوادر مخطوطات کا ایک  قیمتی خزانہ ہے ، اس کی تفصیلات  مولانا کے ذہن میں محفوظ ہیں ، اس میں تقریبا  اٹھارہ  انیس ہزار مطبوعات ، اور اٹھارہ سو مخطوطات ہیں اور ہزارہا اخبارات و رسائل ہیں۔  جن میں سے بعض اخبار و رسائل کی بیس بیس ، تیس تیس  سال کی فائلیں  ہیں  مخطوطات میں سب سے پرانا نسخہ  ’’  الإستغناء في أسماء المعروفين بالغنى لابن عبد البر" کی تلخیص ہے ، جو علامہ  محمد بن ابی الفتح البعلی الحنبلی  کی تصنیف ہے ۔ یہ مخطوطہ خود  مصنف یعنی البعلی کے قلم سے  سنہ ۶۸۶ ہجری  کا لکھا ہو ا ہے ۔ بخاری شریف  کے متعدد نسخے ہیں ، جن  میں سے ایک نسخہ  جو دو جلدوں میں ہے ، نہایت عمدہ اور نہایت  خوب صورت لکھا ہوا ہے ، یہ سنہ ۸۷۲ ہجری کاہے ۔ قضاء الوطر  شرح نخبة الفكر  ‘‘ تصنیف علامہ ابراہیم اللقانی المالکی مکتوبہ محرم سنہ ۱۰۹۷  ہجری ، یہ نسخہ شاہ ولی اللہ کے  استاد علامہ ابو طاہر کردی کے کتب خانے میں رہا ہے، اس پر ان کی مہر ثبت ہے ۔ 
شاید میرے لیے سب سے خوشی کی اور حیر ت انگیز  بات یہ تھی  کہ مولانا کے پاس حافظ ابن حجر عسقلانی  کی ’’ ہدی الساری‘‘   کا  ایک نسخہ موجود ہے ، جو اب تک معلوم دنیا میں سب سے  قدیم نسخہ ہے ، ہدی الساری  سنہ ۸۱۳ ہجری  میں تالیف ہوئی ، یہ نسخہ  محرم  ۸۲۰ ہجری کا لکھا ہوا ہے ، اس کو محمد بن ابی الجاہ حضرمی نے مدرسہ ناصریہ قاہرہ میں  نقل کیا تھا، یہ نسخہ کم سے کم سنہ ۸۴۴ ہجری تک  حافظ ابن حجر کے مطالعے میں رہا ہے ۔ اس پر حافظ نے بے شمار اصلاحات و ترمیمات  و اضافات کیے ہیں، اس پر  اجازات  و سماعات بھی ہیں۔  مولانا نے اس نسخہ کے تعارف میں  فروری ۲۰۱۷  سے مئی  ۲۰۱۷  میں چار قسطوں میں ایک تفصیلی مضمون شائع کیا ہے ۔ پہلی قسط  شمارہ  فروری  میں ابن حجر  کی تحریر  اور دوسرے  حوالوں کی بنا پر   ایک اہم معلومات  فراہم کرتے  ہوے رقم طراز ہیں: 
 ’’ فتح الباری  حافظ ابن حجر کی شروحات  صحیح بخاری میں سے  دوسری کتاب  یا اوسط شرح کا نام ہے ۔ حافظ نے او ل  صحیح بخاری کی ایک مفصل شرح  کی تھی جو مکمل نہیں ہوئی ۔ دوسری فتح الباری ہے ، تیسرا فتح الباری کا خلاصہ  یا  مختصر صحیح بخاری تھی ، یہ بھی مکمل نہیں ہوئی ،  مگر دونوں کے ناتمام نسخے  دریافت ہیں  ،  بڑی شرح کے ارادے سے  صحیح بخاری  کے مطالب و مقاصد کی تنقیح و ترتیب کے لیے حافظ ابن حجر  نے ایک بہت مفصل  ، جامع اور عظیم مقدمہ لکھا تھا ،  اگرچہ  یہ مفصل شرح مکمل ہو کر امت کے  ہاتھوں میں نہیں آئی ، مگر اس شرح کا جو مقدمہ لکھا گیا تھا  وہ ’’ہدی الساری ‘‘ کے نام سے  صحیح بخاری کے نکات  و معضلات حل کرنے میں دنیا  بھر کے  کے حدیث کے طالب علموں کی رہ نمائی کررہا ہے