اچھی بری صحبت کے اثرات

انسان انس سے ہے اور اُس کے بننے بگڑنے میں کسی کی رفاقت و معیت اور صحبت بےحد دخیل ہے، تاریخ میں جتنی عظیم ہستیاں گذری ہیں، وہ کسی مردِ آہن کی محنت و توجیہ سے ہی لائق و فائق اور کار آمد بنے ہیں، جو کوئی بھی بگڑے ہیں وہ اپنے اردگرد کے ماحول سے ہی برباد ہوئے ہیں۔

اثر و قبول انسان کا ہمہ گیر خاصہ ہے، ماحول و معاشرہ اور اچھے برے ساتھیوں کے اطوار وہ بہت جلد اپنا لیتا ہے، ایک آدمی کی تعمیرو تخریب میں اُس کے اردگرد کےحالات و شخصیات کا بھی گہرا اثر ہوتاہے، رات و دن میں سینکڑوں کام لوگ کسی کی دیکھا دیکھی ہی کرتےہیں، سوچ سمجھ کر یاانجانے میں کیا جانے والا عمل ہی اکثرآدمی کی جبلت و خصلت بنتاہے، جس کی طرف عموماً شروع شروع میں ذہن  نہیں جاتا ہے۔ نادان کہے جانے والے بچے بھی اپنے ماں باپ اور گھر کے ماحول کا اثرخودبخود لےلیتے ہیں، شاگرداپنے استاذ کی اداؤں سےخوش ہوکرپیروی کرتا ہے، مرید اپنے مرشد و پیر کا رنگ اپنا کر فخر محسوس کرتاہے۔ 

انسانی طبیعت پر صحبت، رفاقت اور معیت بہت زیادہ اثرانداز ہوتی ہے،اچھوں کی صحبت سے نیکی کا بیج دل دماغ میں جڑپکڑتا ہے اور بروں کی صحبت سے برائی کے جذبات پنپتےہیں یہ ایک حسی اور روزمرہ مشاہدہ کیا جانے والا وصف ہے، جس کی ڈھیر ساری مثالیں ہم اپنی آنکھوں آئے دن دیکھتے ہیں، تاریخ عالم میں جھانکنے سے یہ حقیقت دو دو چار کی طرح واضح ہوجاتی ہے، کہ ہر دور میں صالح افراد کی تشکیل صالحین کی صحبت سے ہوئی ہے، بگڑے مزاجوں کے بننے اور بھٹکے ہوئے آہوؤں کو سوئےحرم لے جانے میں خدا کے نیک بندوں کی رفاقت کا غیر معمولی اثرر ہاہے۔قرآن حکیم میں ارشاد باری تعالی ہے "یٰۤاَیُّهَا الَّذِیْنَ اٰمَنُوا اتَّقُوا اللّٰهَ وَ كُوْنُوْا مَعَ الصّٰدِقِیْنَ (التوبۃ:۱۱۹)" اے ایمان والو ! اللہ سے ڈرو، اور سچے لوگوں کے ساتھ رہا کرو۔ اس آیت میں یہ تعلیم بھی ہے کہ انسان کو اپنی صحبت سچے لوگوں کے ساتھ رکھنی چاہیے، جو زبان کے بھی سچے ہوں، اور عمل کے بھی سچےہوں۔

انسان تو انسان جانوروں کے اثرات بھی لاشعوری طور پہ آدمی قبول کرتا ہے، نبی اکرم ﷺ کا ارشاد گرامی ہے"عن ابي هريرة، ان رسول الله صلى الله عليه وسلم قال‏:‏ ”راس الكفر نحو المشرق، والفخر والخيلاء في اهل الخيل والإبل، الفدادين اهل الوبر، والسكينة في اهل الغنم‏.‏ حضرت ابوہریرہؓ سے روایت ہے کہ رسول اللہ ﷺ نےفرمایا: ”کفر کا سر مشرق کی طرف ہے، فخر اور تکبر گھوڑے والوں اور اونٹوں والوں میں ہے، جو کھیتی باڑی کرنے والے اور سیکڑوں کی تعداد میں مویشی پالنے والے دیہاتی ہیں،تواضع اور ٹھہراؤ بکریاں پالنے والوں میں ہے۔“

 حضرت عمر فاروق ؓ فرماتے ہیں ’’سچے دوست تلاش کرو اور ان کی پناہ میں زندگی گزارو کیونکہ وہ خوشی کی حالت میں زینت اور آزمائش کے وقت سامان ہیں۔ اور کسی گناہ گار کی صحبت اختیار نہ کرو ورنہ اس سے گناہ کرنا ہی سیکھو گے۔
(احیاء العلوم، کتاب آداب الالفۃ والاخوۃ) 
   حضرت امام جعفر صادق ؓ فرماتے ہیں ’’ پانچ قسم کے آدمیوں کی صحبت اختیار نہ کرو: (1بہت جھوٹ بولنے والا شخص،کیونکہ تم اس سے دھوکہ کھاؤ گے ،وہ سراب (یعنی صحراء میں پانی نظر آنے والی ریت ) کی طرح ہے،وہ دور والے کو تیرے قریب کر دے گا اور قریب والے کو دور کر دے گا۔ (2بے وقوف آدمی، کیونکہ اس سے تمہیں کچھ بھی حاصل نہ ہو گا، وہ تمہیں نفع پہنچانا چاہے گا لیکن نقصان پہنچا بیٹھے گا۔ (3بخیل شخص، کیونکہ جب تمہیں اس کی زیادہ ضرورت ہو گی تو وہ دوستی ختم کر دے گا۔ (4بزدل شخص، کیونکہ یہ مشکل وقت میں تمہیں چھوڑ کر بھاگ جائے گا۔ (5فاسق شخص، کیونکہ وہ تمہیں ایک لقمے یا اس سے بھی کم قیمت میں بیچ دے گا۔ کسی نے پوچھا کہ لقمے سے کم کیا ہے؟آپ رَضِیَ اللہُ تَعَالٰی عَنْہُنے فرمایا ’’لالچ رکھنا اور اسے نہ پانا۔
 (احیاء العلوم، کتاب آداب الالفۃ والاخوۃ) 
سعدی شیرازیؒ نے کہا ہے: 
بگفتا من‌ گِلی‌ ناچيز بودم
‌ولیكن‌ مدتی‌ با گُل‌ نشستم‌
کمال‌ هم‌نشين‌ در من‌ اثر کرد
وگرنه‌ من‌ همان‌ خاکم‌ که‌ هستم
 اُس نے کہا میں ایک ناچیز مٹی تھی، لیکن میں ایک زمانہ تک پھول کے ساتھ رہی
ساتھی کے حُسن نے مجھ میں اثر کیا، ورنہ میں تو وہی مٹی کی مٹی ہوں۔ 

مشہودحسن قاسمی

استاذ مدرسہ اسلامیہ اصلاح المسلمین شہر بیلاڑہ جودھپور راجستھان
فاضل دارالعلوم وقف دیوبند متخصص افتاء دارالعلوم ماٹلی والا بھروچ گجرات
کل مواد : 1
شبکۃ المدارس الاسلامیۃ 2010 - 2024

تبصرے

يجب أن تكون عضوا لدينا لتتمكن من التعليق

إنشاء حساب

يستغرق التسجيل بضع ثوان فقط

سجل حسابا جديدا

تسجيل الدخول

تملك حسابا مسجّلا بالفعل؟

سجل دخولك الآن
متعلقہ الفاظ
  • #صحبت
  • آپ بھی لکھئے

    اپنی مفید ومثبت تحریریں ہمیں ارسال کیجئے

    یہاں سے ارسال کیجئے

    ویب سائٹ کا مضمون نگار کی رائے سے متفق ہونا ضروری نہیں، اس سائٹ کے مضامین تجارتی مقاصد کے لئے نقل کرنا یا چھاپنا ممنوع ہے، البتہ غیر تجارتی مقاصد کے لیئے ویب سائٹ کا حوالہ دے کر نشر کرنے کی اجازت ہے.
    ویب سائٹ میں شامل مواد کے حقوق Creative Commons license CC-BY-NC کے تحت محفوظ ہیں
    شبکۃ المدارس الاسلامیۃ 2010 - 2024