ریاض الجنۃ میں سکون سے کئی نمازیں باجماعت پڑھنے کی ترکیب

ایک مہربان بھائی نے روضہ رسول صلی اللہ علیہ وسلم کی جالیوں کے قریب وقت گذارنے اور نماز پڑھنے کی ترکیب عنایت فرمائی تھی، اللہ پاک اسے جزائے خیر عطا فرمائیں۔

اس پر عمل کرنے سے کئی روز اللہ پاک نے یہ نعمت عطا فرمائی کہ عصر کی نماز ریاض الجنۃ میں اسطوانہ وفود کے پاس جالی مبارک کے بالکل ساتھ سر مبارک کی سمت میں پڑھی اور عشاء تک آنحضرت صلی اللہ علیہ وسلم کے جوار میں وقت گزارنا نصیب ہوا، عشاء پڑھ کر وہاں سے نکلا۔
اللہ اللہ کتنا گندہ و گناہگار انسان اور اللہ پاک کی کتنی بڑی رحمت، کتنی عظیم عنایت، عجیب عالم تھا۔ کئی روز تک یہ سعادت نصیب ہوئی۔

کیا سہانی سہانی راتیں تھیں
خواب تھا جو بکھر گیا یونہی

ترکیب یہ تھی کہ ظہر کے بعد ریاض الجنۃ کا حصہ مردوں کے لئے بند کرکے عورتوں کے لئے کھول دیا جاتا ہے۔ عصر کی اذان سے کوئی ایک ڈیڑھ گھنٹہ قبل اگر بندہ ایک خاص مقام پر قنات کے ساتھ لگ کر بیٹھ جائے اور قنات کے کھلنے کا انتظار کرے تو اس کے کھلتے ہی سارا ریاض الجنۃ خالی ملتا ہے اور اگر آگے جالیوں کے پاس کہیں جگہ مل جائے تو عشاء تک وہاں سے کوئی اٹھاتا نہیں ہے۔

لیکن ہے یہ بھی خاصے مجاہدے کا کام، کیونکہ اس عرصے میں بھوک پیاس اور وضو، تینوں کو قابو میں رکھنا ضروری ہے۔